Ingon sila ang beer hinimo gikan sa trigo.
Pero nganong humot man nga kamoteng linung-ag
inig agi nako usahay sa highway Seno?
Dili man pod ni gikang humota sa kusina
sa mga balay ilawom sa tulay sa Tipolo.
Basta diha gyud sa tungod planta sa San Miguel.
Kana bang makita gani nimo ang daku kaayo
nga tangke kay bildo man ang bintana,
nga mora'g diha buhaton ang beer.
Dili sab tingali ni dautang hangin
gikan sa ginhawaan sa usa sa mga pasahero
sa jeep nga akong gisakyan:
kamoteng-utot, kay dili man baho,
hinuon humot.
Kaniadtong bata pa ko
cerveza ang tawag nila sa beer.
“’Day, taga-i mi’g tulo ka cerveza, bi!”
Ang mga Katsila man gud
ang nagdala aning cerveza diri.
Apan pag-abot sa mga Amerkano,
sa radyo ug TV gi-advertize ang beer,
beer na lang sab ang naandan nato.
Lami gyud ang beer, labi na kung bugnaw.
Pait apan lami.
Makalipong, makahubog,
makabusog sab kuno
kay "beer is food" kung taga San Mig pasulti-on.
Ayaw na lang og palit og bugas ug sud-an,
i-inom na lang sa eskina
ang imong kwarta, apili’g sumsoman.
Panlingi lang kay apason unya ka
sa imong asawa, makulatahan ka;
outside the kulambo pa gyud ka.
Beer is cold. Very cold outside the moskitero.
