Didto sa dagat, wala gyuy hasol
Gawas sa kahugaw sa polusyon
ug sa mga dinamitiro
Sagdi lang tong mamana, mga mangingisda
Pero, ingon ana man gyud nang tawo
Sabton na lang nato
Nagmalinawon ra unta ko
Sa akong pagpamuyo
Salom diri, salom didto
Ka-on diri, ka-on didto
Apan gipasol man ko nila
Ambot nganong na-ilad man ko
Kahibalo baya ko nga taga tong
Gitangag sa uhipan
Uhipan ra may nakit-an nako
Sakita, oy!
Bitik akong ngabil
Gibira ang tangsi
Unya, naglisod ko og ginhawa
Mora man ko og astronaut
Nga nawad-an og air tank
Didto sa outer space
Mora bag alien in a strange planet
Sans proper breathing apparatus,
Ingon tang punga.
Kana kung kinahanglan
Bang moginhawa ang alien
Ma-o di-ay toy tawo
Lahi gyud sa isda
Dagku sila, dili sama kadaku
Sa mga balyena, apan dagku sab
Daku pa nako, taas og buhok
Ku-an ba, duna silay buhok,
Duna say opaw pero dunay bungot
Dili pareho namong isda
Nga hingbis ray naa
Gatangag pa gyud og sigarilyo
Ang usa ka mangingisda
Giibot ang taga sa akong ngabil
Unya giitsa ko didto sa baldi
Ipon sa akong mga kabarangay
Daghan mi
Dunay pakol, dunay danggit,
Dunay mamsa, nukos
Apil pang labayan
Gagmay ug dagku gisagol
Ang uban pinukotan,
Gipasol ang uban, sama nako
Sud-an na ming tanan
Hay, kapoya ani, oy!
Nagmalinawon ra man unta ko
Adtong Dominggoha
Namahaw ra man ko
Kahuman magsipilyo, ligo
Unya deretso na unta ko og simba
Napasol na man hinuon ko
Na! Kung dili ko ani tolahon
Sugba o kilawon, silihan
Mayna lang, kay sa i-itsa sa iring.
